الضريبة حجزت علي

بقلم احمد الطيب _ ايله نيوز _
وصلني اليوم رساله على هاتفي من دائرة الضريبة تخبرني الرسالة انه تم الحجز علي بسبب مطالبات ضريبية .. المشكلة ليست بالرسالة .. المشكلة انني اصبحت مهتم جدا لاعرف على ماذا حجزوا .
يا جماعة الخير انا بيتي بالايجار وما عندي سيارة واخر مرة رحت على البنك مشان اشوف الحساب الخاص لجريدة البيداء في عام 2010 وما عندي ارض ولا عمارة ولا مزرعة ولا شاليه ولا رصيد في البنك ولا عندي حساب سري في سويسرا … يا جماعة حتى التلفون الذي استقبل المسج هديه من صديق وابن عم … نفسي اعرف على شو حجزوا … يا جماعة انا باسمي بس اولادي معقول حجزوا على سيما مثلا او على اوس او سندس .
بصراحة العملية بدها شوية أكشن بدي اثبت كميرات على باب العمارة عندي وعلى مدخل الشقة واشوف كيف فرق المداهمة بعملوا بالناس الي معاهم مصاري بس المشكلة ما عندي خزنات حديدية كيف بدنا ندبرها هاي .. ممكن حدا يا اخوان يتصل مع رئيس الوزراء السابق ما غيرو يبعثلي خزنة فاضية مش لشي بس عشان الاكشن يزبط … بتعرفوا حتى هذه ما رح تزبط لانو شقتي صغيرة واكيد الخزنة الواحدة اكبر من الغرفة في الشقة .
ليكون انا يا اخوان بعت الفوسفات والبوتاس والمطار والميناء والاتصالات والكهرباء وانا مش داري .. يعني ممكن انا الي اخذت عطاءات الطريق الصحراوي وسكن كريم لعيش كريم .. او ليكون انا بشتغل مستشار براتب 5000 دينار من عشرين سنة .. ليكون انا اعطيت جنسية للي ما غيرو مهرب الدخان والاسلحة في المفرق .. ليكون انا يا اخوان اشتريت اسهم الملكية من نجيب ميقاتي عندما كان ثمن السهم الواحد 18 قرش ودفعت 48 قرش في السهم الواحد وكلفت الخزينة اكثر من 200 مليون دينار في صفقة مشبوهة ..
ليكون انا زورت دمغة الذهب وانا الي حلقت للبريد الاردني وعملت شركة خاصة ” اي فواتيركم ” … ليكون انا استغليت قانون الطوارئ واخذت اموال الضمان الاجتماعي …
كنا نعتقد ان “حجر” الحكومة والضريبة كبير بعد الاشاعات التي خرجت وتعطش الاردنيين للنيل ممن اكلوا في بطونهم ملايين الدنانير ولم اكن اعلم ان الحكومة والضريبة لن تجرؤ الا على عامة الشعب المعدومين اصلا .
يا جماعة الخير من الاخر انا لا املك غير قلمي واملك كرامتي وعزة نفسي وهذه الاشياء لا يحجز عليها مهما فعلتم ومنكم لا يعرف معناها …
حالي حال كل الشعب الاردني
بسم الله الرحمن الرحيم
(يحسبهم الجاهل أغنياء من التعفف تعرفهم بسيماهم لا يسألون الناس إلحافا )
صدق الله العظيم